Bismillah Ir Rahman Ir Rahim
Traduction Khutba Jummah qui Hazrat Ameer Oul Momeneen, Khalifat Ul Massih Al-Khamis ti faire Vendredi dernier le 15 Octobre 2004 dans Baitul Futuh Morden.
Huzoor fine reçite verset 184 a 186 de Sura Al Baqara et so traduction li comme suit: Allah dire Oh banne qui fine croire nous fine faire Roza obligatoire lors ou pareil coumma li ti obligatoire lors banne qui ti avant ou. Et ça afin qui ou gagne le takwa. Ça roza la li pour quelque jours seulement, donc banne qui malade ou qui en voyage zotte bisin observe ça banne même nombres des jours la ulterieurement. Et banne qui ena capacité zotte bisin donne manger a ene pauvres. Le Fidya. Et celui qui faire ene chose optionel be li meilleur pour li même. Donc garde roza li meilleur pour ou même si seulement ou ti conner. Le mois de Ramdhan c’est le mois cotte le Quran fine reveler comme ene guide pour l’humanité. Et c’est ene ene livre avec banne signes bien Claire et bien distinct. Donc banne qui gagne ça mois la zotte bisin observe roza et banne qui malade ou en voyage zotte pour bisin complete ça dans banne les autres jours. Allah content facilité pour ou et non pas difficiulté. Li content qui ou complete ça banne jours la et ou faire so louanges qui li fine guide ou .
Ensuite Huzoor dire qui a partir de demain Insha Allah le Ramzan pe commencer et ena places qui fine fini commencer, mo fine tender qui ena places içi aussi banne dimounes fine commence garde roza. De toute façon, ça mois la qui améne beaucoup banne bénédictions pour banne qui marche lors Allah so banne enseignements, la-bas pour shaitaan ou bien banne dimounes satanique, ça vine ene mois de difficulté pour zotte, parcequi dans ene Hadith fine dire qui le shaitaan attacher dans ça mois la. Et parcequi banne croyants faire plus zefforts pour marche sur le takwa dans ça mois la et essaye pour sapper avec banne attaques de shaitaan, be ça même qui vine ene difficulté pour shaitaan. Et shaitaan attacher veut dire quand Allah so serviteur pour la cause d’Allah li pas faire banne quiquechoses qui même permissible, be banne zaffaires qui défanne qui shaitaan a tout moment essaye tente li pour ça, qui quantité zefforts li pour faire pour sapper avec ça. Sinon banne qui pena ene imaan bien fort, qui pena ça sentiment de respet de ramzan la complètement dans zotte le coeur, dans le ramzan aussi zotte sous l’emprise de shaitaan même. Dans ramzan aussi zotte negligent lors Allah so ibaadat, dans ramzan aussi zotte essaye usurpe droits les autres et coumma zotte gagne l’occasion zotte faire li. Donc Ramzan li ene mois de benedictions pour banne dimounes qui sincèrement faire ibaadat Allah. Ça mois la li ene mois béni pour banne qui marche lors Allah so banne enseignements et essaye pour faire et zotte faire tous banne neki qui Allah fine ordonne pour faire. Et zotte quitte chaque mal qui Allah fine ordonne zotte quitter, au contraire banne zaffaires qui permette aussi zotte quitte ça pour ene certaine le temps parcequi Allah fine ordonne zotte quitte ça.
Allah fine dire qui banne zaffaires qui besoin quitter dans le roza c’est pour qui ou progrésser dans le takwa. Et qui été le takwa? Le takwa c’est qui ou sapper avec banne péchés, faire zefforts pour sapper avec ça et sapper d’ene tel façon comment dire ou pe cachiette derrière ene bouclier et ou pe prend refuge. Quand ene dimoune cachiette derrière ene zaffaire et pe essaye sappe avec quiquechose, be ena ene crainte aussi la-dans. Quand ou pe sapper avec ene zaffaire qui devant, par crainte ou cachiette par derrière. Fine dire qui garde roza, et accompli banne droits de roza, lers la ou pour progrésser dans takwa. Sinon dans ene Hadith fine dire qui Allah pena aucun plaisir pour garde zotte sans manger. Allah envie qui banne erreurs et péchés qui ou fine faire, pour sapper avec ça banne mauvais consequences la, mo fine créer ene chemin pour zotte. Afin qui sincèrement zotte revine vers moi, et dans ramzan zotte accompli droits de roza, et quitte banne zaffaires qui même permissible aussi zotte quitte ça pour moi et a cause zotte zefforts moi aussi mo envoye ene regard de miséricorde lors zotte. et mo attache shaitaan afin qui a cause ça crainte avec qui zotte garde roza la, et quand zotte garde roza zotte vine derrière ça armure la, zotte gagne le takwa afin qui zotte protéger, afin qui shiataan pas capave cause ou aucun du tort.
Donc fine dire ça takwa la, banne zefforts pour sapper avec banne péchés li pe protége ou a cause ou pe garde roza. Donc quand zotte fine vine sous ça protection la zotte besoin aussi faire zefforts reste sous ça. Maintenant zotte besoin marche lors Allah so banne enseignements et faire ça banne l’effets la vine plus solide. Et banne ce qui pe faire le neki depuis avant même, zotte gagne ene plus grand stage de takwa a travers roza et zotte progrésser aller même et gagne Allah so proximité.
Rapelle bien qui roza c’est pas qui ou quitte manger boire pour quelques temps et zotte gagne ene grand stage de takwa. Pareil comment mo fine dire qui avec roza, ena beaucoup banne mal qui ou besoin quitter. Besoin faire ibaadat Allah plis qui avant, lers la qui ou pour gagne takwa. Et pour ena progrés la-dans.
H.Aqdas Massih Maoud a.s dire qui banne dimounes pas conne vérité de roza. En fait ene pays cotte ene dimoune pas fine aller et li pena aucun connaissance, qui li pour capave dire lors situation de ça pays la. Roza c’est pas juste qui ou reste sans manger sans boire, au contraire ena so vérité et so l’effet qui nous conner avec l’experience. Dans la nature humaine si ou mange moins, autant même ena purification de l’ame. Et ou banne pouvoirs de visions spirituel augmenter. Allah so désir c’est qui ou diminuer ene plaisir et augmente ene lotte. Tout le temps banne rozedaar besoin rapelle qui pas juste besoin reste sans manger sans boire mais besoin continuer faire Allah so zikr afin qui ou l’attention li plus vers Allah, et ou quitte banne zaffaires mondaine. Donc roza veut dire qui ene dimoune quitte ene di pain qui bénéfique seulement pour le corps, li gagne ene deuxième di pain qui ene satisfaction pour l’ame. Et banne dimounes qui garde roza juste pour Allah et pas garde ça comme ene tradition zotte besoin qui zotte faire Allah so louanges, tasbih et éloges c.a.d zotte besoin faire Allah so louanges, faire tasbih aussi et mentionne Allah so grandeur.
Fine dire qui roza li pour bénéfique pour ou quand ou diminuer banne provisions physique et augmente banne provisions spirituel. Pas galouppe derrière banne zaffaires mondaines, faudrait pas qui ou faire Sehri et ler la ou recontinuer ou banne zaffaires mondaines. Lers la banne dimounes mondaines qui pour la santé ou par la mode zotte aussi diminuer zotte poids. Ene baisse dans ou poids li pas besoin pour beauté physique ou pour la santé, mais li besoin pour qui ou gagne le plaisir d’Allah. Et ou pour gagne ça plaisir la quand ou pour ena ene plus grand relation avec Allah. Ou pour courber plus devant li, lers la roza pour sappe ou avec shaitaan et pour faire ou progrésser dans takwa. Et pareil comment mo fine dire, ena beaucoup dimounes qui zotte shaitaan li en liberté même, parcequi zotte pas faire zefforts pour gagne le takwa. Et zotte pas gagne aucun crainte.
Ensuite Allah dire pour gagne ça stage de takwa la, pour augmenter dans neki, et pour sapper avec shaitaan, ça training la li pas pour ene longue le temps pour qui ou tracasser, comment pour rester sans manger sans boire autant jour. Fine dire li pour quelques jours même dans un an. Dans 365 jours dans un an li juste pour 29 ou 30 jours. Autant sacrifice la ou pour besoin faire si ou envie reste protegers avec shaitaan. Et pas juste reste proteger avec shaitaan mais Allah dire pour gagne mo plaisir aussi si zotte envie gagne mo plaisir, mo proximité. Fine dire banne dimounes qui malade ou qui en voyage, ena dimounes qui malade ou qui besoin voyager involontairement, be zotte besoin quitte ça roza la et compléte li plus tard. Ça solution la Allah fine donner a cause zotte pe faire zefforts pour garde relation avec moi, c’est pourquoi mo fine donne zotte ça permission la quand zotte ena contrainte. Banne roza qui zotte pas fine réussi garder zotte complete li pendant l’année. Allah dire mo fine donne zotte ça permission la gardant en vue ça difficulté dans lequel zotte mette zotte dans banne les autres jours pour gagne mo proximité. Fine dire parcequi tout ça banne actions la li a cause moi c’est pourquoi a cause zotte malade ou en voyage, banne roza qui zotte pas pe rester et si zotte dans ene bon situation financière, zotte besoin donne le Fidya. Li ene neki, et complete zotte banne roza dans l’année. Et banne qui malade, ou banne madames qui donne boire ou bien qui enceinte, pour ça banne dimounes la d’aprés zotte capacité zotte besoin donne le Fidya.
H.Massih Maoud a.s ti réponne ene question et fine dire qui Fidya li pour banne dimounes qui pena capacité garde roza sinon banne qui ena la santé, zotte pour capave prend fidya comme ene la porte de sortie pour pas garde roza. Ca mot qui H.Massih Maoud a.s fine servi la, li veut dire qui banne qui ena capacité garde roza aprés, si zotte donne Fidya li ene neki. Et banne qui pena capacité pour garder dutout même pour zotte ena Fidya.
Ena différents commentateurs qui fine donne plusieurs explications lors la, lors fidya. H.Massih Maoud a.s fine dire banne qui ena capacité donne fidya zotte besoin donner, ene dimoune malade temporairement aussi. Ensuite H.Massih Maoud a.s dire Wa-Alallazina Yutikunahu Fidyatun Ta’amum Miskeen. Li dire qui ene fois ça fine vine dans mo le coeur qui faire ena le fidya. Mo fine conner qui c’est pour gagner la capacité, pour gagne l’occasion garde roza. C’est Allah même qui donne l’occasion et chaque zaffaire c’est avec Allah même qui ou besoin demander. Si li envie li capave donne capacité a ene dimoune bien faible aussi pour garde roza. Donc fidya veut dire pour ou gagne capacité. D’aprés moi ene dimoune besoin faire doahs qui O Allah ça c’est to mois béni ça et mo pe priver de ça, et qui conner si mo reste vivant l’année prochaine ou bien non,ou soi si mo pour capave remplace ça banne roza la ou bien non, alors quand ou faire ça qualité doahs be lers la mo certain qui Allah pour donne ene tel dimoune capacité. Fine dire banne qui malade temporairement, si zotte donne fidya, Allah donne zotte l’occasion. Besoin donne fidya et faire doahs aussi.
Ensuite H.Massih Maoud a.s fine dire qui pour marche d’aprés banne enseignements Quran c’est aussi takwa. Fine dire qui Allah fine donne permission a banne qui malade et qui en voyage pour remplace ça roza la banne les autres jours. C’est pourquoi besoin marche lors ça commandement la aussi. Mo fine lire qui si ene dimoune malade ou en voyage et li garde roza be li ene péché, parcequi c’est plaisir Allah qui ou besoin guetter pas ou propre volonté. Et Allah so plaisir li trouve dans obéissance. L’ordre qui li donner besoin marche lors la. Li fine donne ça même l’ordre Mankaana Minkum Marizan Aw-Ala Safarin Faiddatun Min Ayyamin Ukhar. Pas fine mentionne qualité voyage ou maladie. H.Massih Maoud a.s dire qui mo pas garde roza quand mo en voyage et quand mo malade, et aujourd’hui même aussi mo pas bien et mo pas fine garde le roza.
Ensuite H.Massih Maoud a.s dire qui celui qui garde roza dans le mois de ramzan quand li malade ou bien li en voyage, li pe désobéir Allah. Allah fine dire clairement pas garde roza quand ou malade. Celui qui malade besoin garde so roza quand li fine bien et celui qui en voyage li besoin garde so roza quand so voyage terminer. Besoin marche lors ça l’ordre d’Allah la, parcequi ou gagne deliverance avec la Grâce Allah et non pas quand ou montrer ou du biens. Allah pas fine dire si maladie la tigite ou beaucoup, voyage la longue ou bien courte, l’ordre la li generale et besoin suivre li. Si dimoune qui malade la ou en voyage pour garde roza, be zotte pe desobeir.
Ena aussi banne dimounes qui mette difficultés lors zotte même plus qui besoin et zotte dire qui voyage aujourd’hui jour la pas compte comme voyage ça c’est pourquoi capave garde roza. H.Massih Maoud a.s fine expliquer qui neki li pas veut dire qui ou mette difficulté lors ou même déliberement mais neki c’est qui ou suivre Allah so banne enseignements, et pas tire banne les autres conclusions par ou même lors banne l’ordre qui pourtant bien claire. Besoin suivre ça banne enseignements et li ene enseignements bien clair qui celui qui malade ou en voyage besoin pas reste roza. Donc bénédictions li trouve dans obéissance et non dans forcer pour gagne le plaisir d’Allah.
Dans ene Hadith, H.Ibn Umar r.a rapporter qui ene fois ene dimoune fine demande a H.Mohammad s.a.w a propos de roza pendant voyage dans le mois de ramzan. Lors la H.Mohammad s.a.w fine dire qui pas garde roza quand ou dans voyage pendant ramzan. Lors la ça dimoune la fine dire O Prophète d’Allah, mo ena la capacité pour garde le roza. H.Mohammad s.a.w fine dire li qui est-ce qui toi qui plus fort ou bien Allah. Allah fine donne la permission a banne de mo ummat qui malade et qui en voyage pour pas garde le roza. Est-ce qui ene d’entre zotte content qui zotte fine donne quiquechose en sadqa a ene dimoune et li pe refuse ça et li retourne ou.
Donc ça c’est ene sadqa depuis Allah. Ensuite Allah fine conseille nous qui le Quran qui est ene livre complet, qui fine reveler pendant ça mois la. Rapporter qui H Gibrail a.s chaque l’année autant Quran qui tip e reveler li ti pe répéte ça dans ramzan. Et avant la mort de H.Mohammad s.a.w. Deux fois ça fine répéter dans le mois de Ramzan. Donc fine dire qui ena ene grand guide la dans. C’est pourquoi zotte besoin lire ça avec attention dans le mois de Ramzan. Besoin lire même normalement mais dans ça mois la besoin donne plus attention. Lire so traduction et cotte cotte ena arrangements de Darus, la-bas besoin écoute Darus parcequi ena banne zaffaires qui ou pas conner, lers la zotte pour gagne ene plus grand comprehension. Et pour ena plus de détails lors tous banne enseignements, et zotte capave faire ça vine ene partie de zotte la vie. Ensuite dans le deuxième verset aussi fine mentionner qui besoin garde roza, banne voyageurs et malade besoin pas garde le roza et compléte li plus tard. Et Allah so la grâce et so banne faveurs, remercier li et courber devant li. Vine reconnaissant et ça reconnaissance la aussi pour faire zotte augmenter dans le neki. Et li pour faire ou augmenter dans le takwa.
H.Massih Maoud a.s dire qui Shahrul Ramzan Allazi Unzila Fihil Quran, nous conne grandeur de Ramzan avec ça. Banne Sufi fine écrire qui c’est ene grand mois pour analyse et purification du coeur, ou pouvoir spirituel augmenter.Nafsé Ammara qui conduire ou vers le mal ou éloigner avec ça et l’eclat du coeur la veut dire qui la porte de vision li ouvert et ou trouve Allah.
Donc fine dire qui quand ou garde roza, et lire Quran et faire ibaadat, ou le coeur illuminé. Ou gagne ene relation proche avec Allah. Banne namaz li purifier ou l’ame. Dans ça banne jours la donne beaucoup plus attention a namaz afin qui ou l’ame purifier. Et avec roza ou le coeur illuminé, et éclairage du coeur veut dire qui ou gagne ene relation tellement proche avec Allah comment dire ou pe trouve li.
H.Abu Huraira r.a rapporter qui H.Mohammad s.a.w fine dire qui tous actions qui ene dimoune faire li pour li excepter le roza.Allah dire roza li pour moi et c’est mo même qui pour donne so récompense et roza li ene bouclier. Si quelqu’un roza d’entre zotte, zotte besoin pas cause banne causer inutile et si quelqu’un pe dire ou banne injures ou pe la guerre, en réponse ou besoin necque dire li qui mo roza. Serment lors ça être dans lequel ena la vie de Mohammad, l’odeur qui sorti depuis la bouche d’ene rozedaar li beaucoup plus bon qui le parfum de musk auprés d’Allah. Pour ene rozedaar ena deux contentement, ene quand li faire iftaar et deuxième quand li pour joinne so Maitre li pour content a cause so roza.
Huzoor dire banne zaffaires qui fine dire la dans c’est qui Allah dire qui le roza li pour moi. Travails qui ou faire pour la cause d’Allah pas capave même ena zaffaire mondaine la-dans. Et travails qui ou faire a cause Allah li pas pour qui banne dimounes flatte ou, au contraire ou faire zefforts pour qui ça neki la reste cachet. Et quand ou pe cachiette et ou pe faire neki, Allah dire qui mo vine so récompense. Ensuite fine dire qui roza li ene bouclier. Li ene tel protection qui quand ou cachiette derrière ça ou capave sappe ou avec banne attaques de shaitaan. Et li possible quand ensemble avec roza ou faire Allah so ibaadat et ou sapper avec banne mal et banne la guerre. Jusqu’a qui si quelqu’un pe dire ou banne jurons la aussi ou besoin pas en colère, ou pas bisin violent ou besoin dire qui mo pe garde roza. Si chaque Ahmadi faire ça promesse la dans ramzan qui dans chaque place, dans la cage, en dehors parmi banne camarades ou pour agir d’aprés ça, c’est a dire qui ou pas pour réponne banne jurons et ou pas pour la guerre, mo penser qui la moitié banne la guerre dans nous société li pour fini. Donc banne tels dimounes qui envie gagne contentement, plus grand contentement c’est proximité de ou Maitre a cause ça roza la. Ça aussi li claire qui aprés le roza, ça action la pour continuer, ou pour continuner gagne Allah so proximité sinon li pour ene zaffaire temporaire. Allah pas fine dire qui gagne mo proximité dans le mois de Ramzan, ensuite faire ce qui zotte envie aprés.Non. Banne neki qui ou fine adopter la faire ça vine ene partie de ou la vie.
H.Ibn Umar r.a rapporter qui H.Mohammad s.a.w fine dire qui l’etat de banne actions devant Allah li en sept facon. Ena deux actions qui quand ou faire deux zaffaires vine apparent avec ça, et ena deux actions cotte ou gagne so récompense pareil. Et ena ene action cotte so recompense 10 fois plus et ena ene action cotte ou gagne 700 fois. Et ena ene action qui juste Allah conne so récompense et personne d’autre. Ça action avec qui 2 zaffaires vine apparent la c’est qui celui qui gagne Allah quand li pe faire so ibaadat avec sincérité et li pas pe associer personne avec li, pour li ena jannat. Et celui qui joinne Allah quand li associer quelqu’un d’autre avec Allah, so punition c’est l’enfer. Et banne qui faire mauvais actions li pour gagne autant même punition et celui qui fine faire l’intention pour faire neki et pas fine réussi faire li, li pour gagne récompense pareil comment celui qui fine faire neki la. Et celui qui fine faire ene neki li pour gagne 10 récompenses. Et celui qui fine dépense so du biens dans chemin Allah, pour augmente so du biens par 700 fois. Et fine dire qui roza li ene tel action qui garder pour la cause d’Allah et so récompense juste Allah qui conner. Donc pareil coumma fine dire les autres places Allah dire c’est mo même so recompense. Allah pour augmente recompense la autant qui li envie. Quand fine mentionne 700 fois fine dire qui plus qui ça aussi capave ena. Parcequi rozedaar la créer ene changement dans li et essaye gagne le palisir d’Allah, et quand li eassaye continuer ça ça li ene série de récompenses qui continuer aller même.
H.Salman r.a rapporter qui le dernier jour de Shaabaan H.Mohammad s.a.w fine dire O banne dimounes, ena ene mois bien grand et béni qui envie manifester lors zotte. Ena ene tel la nuite la dans qui meilleur qui 1000 mois et Allah fine faire ça mois la so banne roza farz. Et fine faire namaz de ça la nuite la banne nafil. Li ene tel mois qui so premier partie c’est la grâce Rahmat et deuxième partie c’est maghfirat pardon et dernier partie li délivrer ou de l’enfer.Najaat Et celui qui fine passe la soif d’ene rozadar be Allah pour donne li a boire et a tel point qui li pas pour gagne soif même jamais avant qui li rentre dans Jana’at. Ici fine aussi clarifier qui roza de ça mois la li farz. Donc pas cherche banne pretextes. Et deuxième besoin pas juste reste sans manger sans boire mais besoin faire plus ibaadat, besoin faire ibaadat dans la nuite, c’est a ce moment la qui ou pour vine héritiers de ça banne récompenses la et ou pour rentre dans jannat pareil comment Allah fine promette.
H.Salmaan r.a rapporter qui dans ça Hadith qui fecque mentionner avant la, dans ene lotte Hadith fine ajouter qui au cours de ça mois la celui qui faire ene action nafil li comme ci pe faire ene action Farz et celui qui fine faire farz be li pour coumma quelqun qui a part le ramazan li fine faire 70 farz et le mois de ramzan li ene mois de patience et recompense de patience c’est jannat. Et c’est ene tel mois cotte ene croyant gagne barakat de provisions, c.a.d dans fraternité, amour, sympathie. Donc patience li nécéssaire. Comment pour prend patience, ou garde roza et ou prend patience lors manger. Ou prend patience lors ou banne désirs sexuel aussi. Ou faire patience lors comportement banne dimounes, ou prend patience quand les autres pe usurpe ou banne droits, parcequi Allah fine ordonner qui besoin pas la guerre. La-dans ena l’ordre pour ena sympathie pour banne dimounes, donc c’est a ce moment la qui ou pour capave tire profit de ça, ou pour capave gagne barakat. Et a cause de ça, a cause ça patience et sympathie la, ou reste tranquille quand dimounes pe faire dominère avec ou, Allah pour donne ou progrés spirituelle et fine aussi dire qui ou pour gagne provisions mondaines aussi. Banne qui faire quique travail pour la cause Allah, Allah li même li vine so protecteur.
H.Abu Masood Ghafari r.a rapporter qui aprés qui le ramzan fine commencer, mo fine tanne H.Mohammad s.a.w dire qui si banne dimounes ti conne grandeur de ramzan, mo ummat ti pour envie qui ena le ramzan tout le long de l’année.
Lors la ene dimoune de Banu Ghaza fine dire O Prophète d’Allah, mette nous au courant de bienfait de ramzan. H.Mohammad s.a.w fine dire qui certainement quand le ramazan commencer le jana’at li ouvert pour tout le long de l’annee avec le ramazan,Donc quand li le premier jour de ramzan, ena banne ti divent divines qui passer sous le throne d’Allah.
Dans ene Hadith, H.Abu Huraira r.a rapporter qui H.Mohammad s.a.w fine dire qui quand li le premier nuite de ramzan, Allah guette so banne creatures, et quand Allah envoye so regard lors ene so serviteur, jamais li pas donne li punition. Et Allah tous les jours li donne de milliers, de centaines de milliers de banne dimounes deliverance depuis l’enfer. Donc quand li le 29ème nuite de ramzan, Allah pardonne banne dimounes ça pareil coumma 28 derniers jours de ramzan la. Huzoor dire içi, le mot qui fine servi dans le Hadith, Abad, c.a.d celui qui ena ene obéissance complet, celui qui courber vers Allah, faire so ibaadat. Fien dire quand ene tel serviteur li pour moi, mo pour envelope li dans mo l’amour. Lers la aucun ennemi pas pour capave cause li aucun du otrt et Allah pour faire li vine héritiers de jannat. Qui Allah donne zotte tous ça l’occasion la.
H.Anas Bin Malik r.a rapporter qui mo fine tanne H.Mohammad s.a.w dire qui le ramzan fine vini et banne la porte de jannat ouvert et banne la porte de l’enfer fermer. Et attache banne shaitaan avec banne la chaines. Destruction lors ça dimoune qui fine gagne le ramzan la et li pas fine gagne le pardon. Si dans ramzan li pas fine gagne le pardon be quand est-ce qui li pour gagne le pardon.?Donc avec ça, ça fine éclairci le premier Hadith qui malgré qui Allah fine créer tous banne provisions pour qui ene dimoune vine ene serviteur sincère d’Allah, si ça dimoune la pas tire profit de ramzan, li pas faire Allah so ibaadat, li pas suivre Allah so banne enseignements, li pas faire le neki, donc fine dire ou capave juste gagne chagrin pour li, au contraire Allah so prophete fine dire qui destruction lors li qui malgré tout ça banne provisions la, malgré tout Allah so faveur, li pas fine capave gagne le pardon. Donc pour principe de ça pardon la, besoin adopter Hakukullah et Hakukul Ibaad, c.a.d droits d’Allah et de so banne serviteurs. Qui Allah donne ça l’occasion la.
H.Abu Huraira r.a rapporter qui H.Mohammad s.a.w fine dire qui celui qui dans le roza de ramzan et dans l’etat de imaan, li fine examine so l’ame, so banne péchés avant pour pardoner. Et si zotte ti conner qui banne profit de ramzan, certainement zotte ti pour envie qui tout le long de l’année li ramzan même. Donc pareil comment fine dire dans le premier Hadith, qui pour pardonne de milliers, de centaines de milliers, ena so explication içi. Si ou roza li dans ene situation de imaan, ou pe garde roza et ou ena imaan aussi, ou pe accompli banne droits de roza, ou pe examine ou l’ame, et ou pe surveille ou même et pas défauts de banne les autres dimounes, ou vine ene serviteur sincère d’Allah, lers la ou pour gagne ça benedictions la.
Nazar Bin Shebaan dire qui mo fine dire Abu Salma Bin Abdul Rahman qui dire nous ene tel zaffaire a propos de ramzan qui ou fine tanne de ou papa et qui li fine tender de H.Mohammad s.a.w. H.Salma Bin Abdul Rahman fine dire qui mo papa fine dire moi qui H.Mohammad s.a.w fine dire Allah fine faire banne roza de ramzan farz lors toi. Donc celui qui avec imaan et avec ene intention pour gagne bénédictions, li garde le roza, li délivrer de banne péchés comment dire so maman fecque donne li naissance.
H.Abu Huraira r.a rapporter qui H.Mohammad s.a.w fine dire qui roza li ene bouclier et li sauve ou de l’enfer. Ou comme ci proteger dans ene fort.Mais derrière ça bouclier la jusqu’a quand ou pour protéger?Dans ene lotte Hadith fine dire qui ou pour protéger tanque qui ou reste en dehors de ghibat et mensonge. Donc dans ramzan,ou pour gagne banne bénédictions de ramzan, quand ou quitte ça banne mal qui parraitre tipti la mais qui en fait bien grand. Ene grand mal qui banne dimounes pas prend compte c’est le mensonge. Si ou pe cause menti ou pe casse ça bouclier la, si ou pe faire ghibat, cause dimounes,faire banne palabres, ça aussi li casse bouclier de ou roza. Donc si ou garde roza avec tous banne conditions pour reste ene bouclier sinon fine dire qui roza li pour juste ene zaffaire qui ou reste sans manger sans boire. Qui Allah donne nous l’occasion pour garde roza avec tous so banne conditions et qui nous garde roza sincèrement pour Allah, pas pour montrer dimoune, qui nous pas tire aucun prétexte pour roza. Et qui Allah donne nous l’occasion pour faire nous banne la nuites vivant dans ça mois la. Et quand nous marche lors chemin de neki dans ça ramzan la, ça doah la aussi nous besoin faire qui ça banne neki la li pas fini avec fin de ramzan mais qui li reste tout le temps ene partie de nous. Et qui chacun d’entre nous vine parmi banne bien-aimé d’Allah, tout le temps nous gagne so l’amour, et qui Allah faire qui ça ramzan améne ene victoire extraordinaire pour nous, pour le Jamaat.
Huzoor dire maintenant mo envie mentionne quelques banne zaffaires a propos de Jamaat de UK. Dans banne jours precedents mo fine faire tourné de banne la villes, fine faire ouverture Masjid Birmingham, fine mette fondation pour masjid de Bradford, ene joli terrain zotte fine acheter lors ene montagne, capave trouve entier la ville depuis la-bas, terrain pas autant grand mais ena l’espoir qui quand masjid la pour compléter pour ena beaucoup banne namazi la-dans. Ensuite fine mette fondation de masjid de Hartlepool, ça ausssi ene trés joli place mais içi Jamaat li tipti, et maintenant fine ena ene augmentation dans nombre, pour ene longue le temps ti ena quelques banne membres même. Ena banne asylum-seekers aussi qui fine alle la-bas. Plan de masjid la li trés joli. Feu Dr Hamid Khan saheb ti faire beaucoup zefforts pour qui ena ene masjid la-dans. De toute façon li fine aider beaucoup jusqu’a dernier l’heure. Qui Allah recompense li et augmente so stage. Maintenant quand mo fine demander la-bas lors construction, zotte fine dire moi a cause finance zotte envie faire ça plus petit. Mo fine dire zotte pas faire li plus petit, Allah pour aider Insha Allah. Mais dans voyage Amir Saheb fine dire moi qui ene temps Ansarullah UK ti promette a H.Khalifat Ul Massih Rabbé qui zotte pour arrange masjid dans Hartlepool. Si zotte ti promette li bon, complete li. Et si zotte pas fine promette aussi, be maintenant mo me donne ça travail la a Ansarullah UK. Zotte besoin aide banne dimounes de la-bas autant qui zotte capave et arrange masjid la d’aprés so plan. Ena ene dépense de 500,000 livres sterling pour ça masjid la. Donc comment banne Ansarullah pour faire ça zotte besoin faire zotte plan. De toute façon zotte besoin aider, Jamaat la bien titpi la-bas. Et ensuite dans Bradford si mo rapelle bien li pe coute 6 millions et 16,000 livres sterling. La-bas ene grand masjid pour construire, ena place. Ena beaucoup banne dimounes qui faire commerce la-bas, et mo garde l’espoir qui zotte pour aider, et pour complete ça masjid la. Mais li possible qui ena qui promette et aprés zotte pas capave complete zotte promesse a cause quique contraintes. Donc içi mo pe mette Khuddam Ul Ahmadiyya et Lajna Imaillah pour aide zotte la-dans. Et banne Lajna tout le temps zotte fine faire sacrifices et nous Masjid Fazal, c’est banne Lajna même qui ti ramasse casse. Donc banne Lajna de Uk besoin faire zefforts la dans parcequi li mo désir qui ça deux masjid la fini construire pendant ça un an la, Insha Allah. Qui Allah donne l’occasion dans ça ramzan la pour donne l’attention a doahs et sacrifices. Qui Allah donne zotte tout l’occasion.
Leave a Reply