Dars Mercredi 17 Juillet 2013 (Extraits Khutbah Jummah du 21 Septembre 2007)
Allah fine faire le roza obligatoire pour le takwa. Mais dans Islam péna ça severité la qui comment dire si ou pas fine reste le roza, ou pas pour gagne takwa dans ou, et pas çapave même gagne Allah so proximité. Ou çapave tire profit de ça banne situations temporaire, mais ça aussi besoin guetter si li ene situation cotte le roza li vine ene action difficile, c’est pourquoi pe quitte le roza et non faire banne pretextes. Donc dans ça situation la ou besoin faire ene pauvre garde le roza, et pas faire banne pretextes et dire qui mo pena çapacité garde le roza, mo ena le moyen, donc mo faire ene pauvre reste le roza. Mo fine gagne bénédictions et mo pas fine besoin reste roza aussi. Ça li pas le takwa et pas çapave gagne Allah so plaisir aussi avec ça.
Si pour banne namaz qui pas fine faire avec bon l’intention Allah dire qui ça banne namaz la jette ça lors visage de ça banne dimounes la. Be banne fidya qui pas fine donner avec bon intention, ça aussi pour retourne lors ou figure.
H.Massih Maoud a.s dire qui fidya li pour banne dimounes qui pena çapacité pour garde roza même, mais banne dimounes qui après ene moment pour regagne zotte la santé pour seulement fier lors le fidya, li ouvert la porte du feu. Fine dire qui dans ene religion cotte pena la lutte et efforts ça deen la li pas répresente nanrien pour nous. De la même façon pour tire Allah so fardeau qui fine metter la tire ça depuis lors ou la tête, li ène peche sevère. Allah dire qui banne qui faire efforts et la lutte dans mo chemin, c’est a zotte qui pour donne ça guide la. Donc quand banne dimounes cherche banne souplesses et banne prétexte, zotte devier depuis religion zotte aller même. Donc tout le temps besoin garde en vue ça commandement d’Allah la. Qui celui qui avec contentement et obeisance faire ène bon travail, ça li pour meilleur pour li. Et si zotte conner zotte çapave comprend qui li meilleur pour zotte pour zotte garde le roza.
Dans ene hadith, H.Mohammad s.a.w fine dire qui roza apart qui li necessaire pour ou la santé spirituel li aussi necessaire pour ou la santé physique. Et aujourd’hui jour banne scientists et banne docteurs dire ça même. Donc li devoir de chaque musulman qui tout le temps zotte besoin garde ça en vue, qui pour le takwa fine mette le roza obligatoire. Et la lutte la li necessaire pour le takwa. Li necessaire faire banne sacrifices pour gagne Allah so plaisir. Oui c’est Allah so faveur lors nous ça qui li fine trouve nous situation, nous contraintes, ça banne permissions qui li fine donne nous, nous besoin tire profit de ça autant qui li permettre. Et pas vine banne qui depasse banne limites qui Allah fine metter.
H.Massih Maoud a.s dire ene place qui ene dimoune qui so le coeur content quand le ramzan fine vini, et mo ti pe attane qui ça vini et mo garde le roza. Et après si a çause quique maladie pas fine çapave garde le roza, be depuis le ciel ça roza la li pas fine epargner. Dans ça le monde la ena beaucoup dimounes qui tire banne pretextes. Et zotte penser qui pareil comment nous decevoir monde,comme ça même nous çapave decevoir Allah. Zotte cherche banne pretexte et inclure banne formalites la-dans, et faire ça banne problemes la parraitre vrai. Mais auprès d’Allah ça li pas bon. Formalité li bien vaste, si ene dimoune envie, li çapave avec formalité toute longue so la vie faire namaz assiser, et pas garde roza de ramzan du tout. Mais Allah conne so l’intention. Celui qui ena sincerite dans li Allah conner, Allah conner qui ena la peine dans so le coeur, et Allah recompense li beaucoup plus.
Leave a Reply