Discours de Huzoor à l'occasion de Ijtema de la Lajna de UK -19 Novembre 2006
Speeches
19.11.06
Bismillah Ir Rahman Ir Rahim
Traduction du discours qui Hazrat Ameer Oul Momeneen, Khalifat Ul Massih Al-Khamis ti faire à l’occasion de Ijtéma de la Lajna de UK le 19 Novembre 2006.
Après Sura Fatiha, Huzoor dire : « Qui aujourd’hui zotte fine rassembler pour zotte Ijtéma et aujourd’hui li le dernier jour. Ça banne Ijtémas-là fine organiser afin qui madames et ti filles Ahmadi gagne banne enseignements religieuse et afin qui capave faire zotte Tarbiyyat. Afin qui zotte capave joinne et assiser et écoute banne discours et gagne l’occasion pour éloigne banne faiblesses qui éna dans zotte. Banne tipti tifilles et banne jeunes filles ensemble avec zotte reforme quand zotte prend part dans banne differents programmes, zotte gagne l’occasion pour développe zotte banne capacités intellectuel. éna ène environnement spéciale qui créer afin qui ou capave pense et créer banne meilleur chemins pour faire ou reforme. Quand banne tifis, jeunes filles, banne madames d’ène peuple rassembler ène place avec ça pensée-là cotte zotte reste dans ène environnement exclusivement religieuse et spirituelle, zotte passe zotte le temps dans banne programmes et participe dans banne programmes, ça peuple-là ni zotte banne génération alle détruire et ni jamais zotte alle dans déclin.
Donc aujourd’hui seulement pour la cause d’Allah si ène madame fine rassembler ici seulement pour ça banne but pure-là, bé ça c’est ène madame Ahmadi. C’est pourquoi tout le temps rappelle ça stage qui ou éna-là. Banne nourritures de connaissance et spirituel qui ou fine gagner ici et qui ou pé gagner, tire profit de ça, là-dans même éna ou l’avenir, ou survie. Là-dans même éna l’avenir de ou générations. Là-dans même éna l’honneur de ou famille, et zotte l’avenir. Banne dimoune jamais pas besoin éna égoisme, li pas besoin gagne seulement so tracas, li pas besoin gagne tracas de so nécessités seulement. Li pas besoin prend compte so banne sentiments seulement. Au contraire li besoin gagne tracas les autres. Au contraire li besoin éna pensée de sacrifices pour besoins de banne les autres dimounes. Li besoin prend compte sentiments les autres dimounes. Li pas besoin pense seulement so l’honneur. Au contraire li besoin pense l’honneur de so famille, de so Jama’at tout le temps. Ça affaire-là li besoin rappelle tout le temps qui mo éna ène Allah Qui grand et Qui pé trouve moi tout le temps. Mo éna ène Allah Qui Connaisseur, So regard li alle jusqu’à en profondeur de moi. Li conne tout quiquechose qui mo faire, c’est pourquoi péna nanrien qui capave cachiette de Lui. C’est pourquoi quand Li conne tout banne quiquechoses, Li conne tout ce qui éna endans moi et en dehors moi, donc quand mo annoncer qui mo ène madame Ahmadi, besoin rappelle tout le temps qui mo besoin attire l’attention lors banne zaffaires qui Allah fine envoye nous à travers Hazrat Mohammads.a.w. Si jamais pour quique raison nous fine oublier ça banne quiquechoses-là, bé quand pé rappelle nous ça banne affaires-là, bé comme banne bon serviteurs d’Allah nous besoin faire banne tels actions coumma banne bon serviteurs d’Allah faire. Et pour qui Allah dire banne dimounes qui quand rappelle zotte versets de zotte Maitre, pas agir comme banne aveugles et banne sourds. Certainement ène madame Ahmadi qui éna ène la grain de néki (le bien) dans so le coeur, qui fine faire li reste établi lors Ahmadiyyat jusqu’à maintenant, qui fidèle, qui pour la cause de deen zotte faire sacrifice, qui éna ène relation d’amour et d’affection avec le Khilafat-e-Ahmadiyya ; quand conseille zotte, zotte pas agir comme banne sourds et aveugles. Et si zotte ène vrai Ahmadi, c’est ça même qui nous attane d’ène Ahmadi, zotte besoin faire zefforts pour agir lors chaque conseil et non pas zotte agir comme banne sourds et aveugles.
Donc coumma mo fine dire ène vrai Ahmadi li besoin penser qui mo besoin donne attention à banne zaffaires qui Allah et So Prophetes.a.w fine dire nous. Et c’est ça même signe et éclat d’ène croyant. Ou faire Ahad, ou faire promesse, mette ça promesse-là tout le temps devant ou. Quand Hazrat Mohammads.a.w fine prend bai‘at avec banne madames, bé ti éna aussi banne les autres affaires, les autres conditions qui plis qui ti éna avec bai‘at de banne hommes qui mentionner dans Quran. Ti éna qui ou besoin sapper avec shirk, faire attention pour sapper avec le mal, pour faire bon tarbiyyat de banne zenfants ; ensuite fine dire qui nous pas pour désobéir toi dans aucun bon zaffaire qui ou dire.
Donc Allah Li pas agir de force avec ou. Oui si ou fine vini pour vine banne Musulmans li nécessaire qui ou accompli ça banne conditions-là qui nécessaire pour qui ou rentre dans Islam. Hazrat Massih Ma’ouda.s ti pé donne bai‘at à banne madames, li ti pé donne même conseils.
Donc banne pensées qui vine dans certains dimounes zotte l’esprit, qui nous libre, surtout dans ça environnement-là,et surtout dans société d’aujourd’hui bé rappelle qui ou libre à ène certaine limite. Mais quand li concerne ou deen, banne la loi islamique, ou pas libre. Si ou fine rentre dans Jama’at ou besoin n’importe comment suivre banne conditions qui nécessaire pour ène Ahmadi. Guetter au commencement quand ça banne madames-là ti prend bai‘at dans l’époque de Hazrat Mohammads.a.w, ça société-là li ti totalement libre. Pas ti éna aucun la loi ça l’époque-là ; zotte ti éna plus beaucoup banne mauvais l’habitude dans zotte qui éna aujourd’hui. Ti éna manque de connaissance, ti éna quelques-uns qui ti éna un peu connaissance mais ça aussi bien tigitte. Zotte pas ti éna aucun l’idée lor Allah So Être. Zotte ti conne seulement banne idoles. Zotte pas ti conner ça Allah Qui Grand et Qui conne tout-là qui Li été en fait. Mais quand zotte fine prend bai‘at, zotte fine créer ène révolution dans zotte la vie. Quand zotte fine sorti de ça l’obscurité d’ignorance cotte zotte ti été-là, quand zotte fine gagne la lumière de l’Islam, bé c’est ène madame qui fine vine moyen pour répanne ça la lumière de connaissance-là. Zotte fine enseigne banne grand grand dimounes le pardah, banne exemples de deen. Et zotte fine gagne ça certificat-là de Hazrat Mohammads.a.w qui si zotte envie gagne la moitié de connaissance de deen, bé prend li avec Hazrat Aisha(r.a.).
Dans banne batailles si fine éna banne exemples, bé tout en gardant zotte pardah, zotte sainteté, tout seul zotte fine montrer courage et fine libère zotte frère prisonnier de l’armée de Romeo. Et dans l’histoire ça madame-là ti connu comme Hazrat Khawla. Ensuite dans Madina quand banne incroyants fine attaquer, quand banne missiers ti pé faire protection en dehors, ti pé fouille banne tranchées, banne madames fine prend responsabilité pour protége zotte la case. Et quand banne Juifs ti envoye ène dimoune pour espionner pour guetter par qui côté de Madina zotte capave attaquer, c’est ène madame fine blesse li et fine attache li, et fine jette li en dehors.
Dans bataille de Uhud quand pas de banne Musulmans fine trembler, c’est banne madames ça l’heure-là qui fine donne l’exemple, par amour pour la religion et Hazrat Mohammads.a.w. Et zotte fine créer ène exemple de fidélité. Donc ça la force-là, ça courage-là, ça fidelité-là, ça connaissance-là fine gagner parce qui zotte fine suivre banne enseignements de l’Islam et zotte fine faire ça vine partie de zotte la vie. C’est pourquoi rappelle tout le temps qui si ou pour suivre enseignements de ou deen, ou pour faire zefforts suivre tout banne commandements d’Allah, ou pour attire ou l’attention vers Allah So ibaadat (adoration), ou pour éna sense de l’honneur pour la religion et aussi la fidélité. Et ou pour délivrer ou de tout qualité complexe. Sinon dans ça banne tentations et éclats mondaines-là ou pour plonger comme banne dimounes mondaine. Donc pareil comment banne madames de l’époque de Hazrat Mohammads.a.w fine créer ça révolution-là dans zotte, zotte fine vine banne vrai Musulmanes, banne vrai croyantes, banne qui satisfait avec ce qui zotte éna, zotte fine vine banne qui suivre et banne qui faire ibaadat (adoration), ou aussi si ou envie marche lors ça banne pas-là ou besoin suivre banne enseignements de l’Islam. Si ou pas fine adopter ça banne enseignements-là, pas capave appelle ou banne Musulmans. Si ou pas fine créer la force dans ou imaan (la foi), et ou pas fine sappe ou de banne mals de la société, bé pas capave appelle ou banne croyantes. Si ou péna ène haute niveau d’obéissance, pas capave appelle ou banne qui éna qana’at. Si ou l’attention pas attirer vers tauba (le pardon) et ibaadat (l’adoration) à chaque moment, pas capave appelle ou banne qui éna remords, banne dimounes pieux.
Donc faire ène analyse de ou même, qui ou revendiquer et qui ou actions été. Faire ou propre analyse. Tout le temps mette ça but-là devant ou dans qui but dimoune fine créer ?). Ou besoin garde ou regard lors Allah So plaisir. Mette banne grand buts, banne grand targets devant ou, qui ou besoin atteindre. Quand ou pour éna banne grand targets devant ou, ou pour faire zefforts pour gagne li. Banne ti filles aussi besoin analyse zottes-même et banne mamans aussi besoin analyse zottes-même. Avec ça ou capave faire ou propre reforme et reforme de ou générations. Ou capave faire tarbiyyat de ou banne zenfants dans ène bon façon. Aujourd’hui dans la société, de chaque coté pé faire attaques contre Islam. Aujourd’hui pour défanne ça, chaque tifis Ahmadis, chaque jeune fille Ahmadi et chaque madame Ahmadi besoin vine lors terrain pareil comment banne madames de l’époque avant ti pé faire. Sinon pour demande ou qui responsabilité ou ti éna et qui travail ou fine faire. Qui zotte revendications, qui zotte actions ti été.
Aujourd’hui pé faire attaques lors Islam en référence avec banne madames, ça fine vine ène bel sujet de discussion, hijaab, écharpe, pardah ou burqa. Banne missiers, quand même combien clarifications et éclaircissements zotte capave donner à banne objections qui banne-là faire concernant le pardah dans l’Islam, combien justifications zotte capave donner, mais si quiquene capave donne ène vrai réponse pour ça, c’est bien ène bon madame Ahmadi qui capave donner.
Donc au lieu qui ou tombe dans quique complexe, comme banne madames musulmanes Ahmadi qui éna courage, faire conne ça zaffaire-là dans ou l’environnement et dans ou société avec ou banne actions, ou banne arguments qui ça vieux instructions de Quran-là li pour nous l’honneur ça. Pour protége nous. Donc li pas ène emprisonnement ça. Guette l’état de ça banne dimounes-là ène coup : d’ène côté zotte objecter lors Islam et dire qui éna la force, éna sévérité, mais d’ène l’autre côté zotte même pé intervenir dans banne zaffaires personnel d’ène dimoune. Si ène madame envie mette ène foulard, mette ène hijaab besoin demande zotte qui difficulté zotte pé gagner avec ça zotte. La majorité banne madames musulmane aujourd’hui, puisque action-là nepli éna pour banne qui pas fine accepter Hazrat Massih Ma’ouda.s, la majorité zotte pas faire pardah. Donc Islam pas pé puni zotte, aucun la loi pas pé puni zotte, mais banne qui pé suivre banne enseignements de la religion et pé faire pardah, qui droit banne dimounes de banne les autres religions éna pour faire la loi pour zotte, pour dire zotte pas couvert, pas couvert la tête. Demain zotte pour dire zotte to linge pas bon, pas mette salwar, mette robe ou bien mette jeans, nous éna objections lors-là, zotte pour dire mette maxi mette ceci et cela. Après zotte pour dire pas habille comme ça, mette banne robes courtes, banne mini-jupes ou bien reste tout nu.
Donc ça banne dimounes-là péna aucun droit pour jouer avec ou l’honneur. C’est ou qui besoin réponne zotte et dire zotte qui zotte été pour mette zotte neznez dans zaffaires personnel d’ène dimoune. Demande zotte et dire qui ça aussi li contre la liberté ça. Linge d’ène dimoune li ène quiquechose personnel, qui faire zotte pé essaye arrache ça liberté-là. Mais parce qui c’est zotte gouvernement, c’est zotte qui pé dirige le monde, zotte dire banne zaffaires qui pas en droit et penser qui nous fine dire banne quiquechoses bien intelligent.
Ene madame Ahmadi li besoin faire li respecter, et li besoin réponne à chaque objection et reste prêt pour ça. Ena certain banne madames zotte appelle zotte banne Ahmadis, mais pas conner qui faire zotte laisse zotte vine victimes de banne complexes. Ena quiqu’ène fine dire qui ène madame fine dire qui si mo tifi pas pé mette foulard, li pé mette jeans et les autres l’habillements, pas dire li nanrien, li bien décent. Qui faire li décent, parce qui li pas fine faire camarade avec garçon, li libre, li conner qui bon et qui pas bon pour li. Donc ça c’est ène zaffaire qui gatte tarbiyyat de banne zenfants. Aujourd’hui si péna camaraderie, demain capave éna li. Aujourd’hui si zotte pas engager dans aucun mal, bé à cause ça liberté-là zotte capave alle tombe dans banne mauvais quiquechoses aussi. Si li libre, li conner qui bon pour li, et li libre pour pas suivre banne enseignements islamique, banne enseignements lors pardah, bé le Jama’at aussi li libre, l’organisation du Jama’at aussi libre, le Khalifa de l’époque li éna plus droit pour mette ça banne qualités dimounes-là en dehors du Jama’at. Banne qui pas suivre banne enseignements fondamentale du Qur’an.
Quand ou pé rentre membre dans ène club mondaine, bé pour gagne membership (pour vine membre) ou besoin respecter banne rules et regulations (règlements de ça club-là), si ou pas respecter ça, bé ou membership fini, ou népli membre. Donc ça zaffaire de religion-là li avec Allah. Ena ène relation avec Allah, ène promesse de bai‘at, si ou pour agir contre ça banne enseignements clair-là, et ou refuse accepter ça banne enseignements-là, bé si ou ou soit ou tifi éna droit pour pas faire pardah, oui, bé moi aussi mo éna même droit pareil comment ou éna-là qui mo mette en dehors du Jama’at ça banne dimounes qui pé désobéir-là. Moi mo pour suivre enseignement d’Allah. C’est pourquoi personne besoin pas éna complaintes. Ici laisse mo dire à banne l’organisations qui, comme ène premier pas, faire ça analyse-là pour guetter qui faudrait pas qui aucun ti fille ou aucun madame qui pas faire pardah li ène officier du Jama’at . Pas besoin éna ça. Si pas pé gagne ène dimoune pour faire travail Jama’at c’est-à-dire dans ène l’endroit cotte pas pé gagne dimoune qui faire pardah pour travail attache ça Majlis-là avec ène l’autre Majlis. Ou bien même si li ène dimoune qui éna moins connaissance donne li ça travail-là pour faire. Si pas gagne personne qui d’après banne enseignements islamique pas pé couvert zotte cheveux, zotte la tête, zotte beauté dans ène Majlis et péna ène l’autre Majlis qui proche, bé faire ferme ça Majlis-là, ça branche-là.
Huzoor dire : « Ça image effrayant qui mo fine mette devant ou-là, insh’Allah mo espérer qui pas pour éna ça aucun place. Par la Grâce d’Allah éna beaucoup banne madames qui vine en avant pour faire travail Jama’at. Si dans banne madames âgé péna li, mo pé trouve li dans banne jeunes filles qui éna, qui pure d’hypocrisie, qui pas faire aucun sorte d’hypocrisie. Ena à cause l’environnement de zotte la case, zotte comme ça ; mais éna beaucoup qui faire beaucoup plus néki (le bien) qui zotte banne grands. Zotte faire zefforts pour prend ène hijaab, pour garde zotte pudeur. Zotte ti faire ène programme lors MTA qui mo ti pé guetter, li pas encore passer mais mo ti pé guette recording-là. Là-dans éna ène tifi qui aussi ène professeur, li fine dire qui : ‘Mo couvert mo la tête dans l’école aussi parce qui mo pas envie montrer banne zenfants qui mo fine adopter deux facettes ou mo pé agir avec hypocrisie. Si banne zenfants trouve moi en dehors couvert mo la tête zotte pour dire qui faire dans l’école mo pas faire li. Qui faire mo pas couvert la tête dans l’école ?’ Donc de toute façon pardah li ène commandement islamique. Dans ça programme-là ti pé aussi dire qui éna ène nous professeur qui travaille avec banne zenfants primaire et li pas couvert so la tête, li correcte, péna nanrien de mal là-dans, cotte éna banne ti zenfants et banne madames certainement ou capave pas couvert ou la tête. Mais peut-être dans ça premier cas-là ça tifi-là ti travaille dans ène l’école cotte éna banne grand zenfants.
Donc de toute façon li ène commandement islamique, et l’éclat d’ène tifi et madame Ahmadi. Et c’est so sainteté aussi. Sainteté d’ène madame Ahmadi reste etabli avec ça. Li nécessaire pour garde ça, mais rappelle bien ensemble avec foulard ou vêtements aussi besoin correcte. Li Allah So commandement ça pour pas trouve ou beauté. Ena tifis qui pas Ahmadis certainement zotte fine mette foulard comme réaction à ça banne oppositions-là, zotte dire qui faire pé empêche nous mette foulard, mais vêtements qui zotte metter c’est ène jeans serrer et ène blouse coller. Qui serti faire pardah comme ça ? C’est ène hypocrisie ça. Pardah li besoin tel qui éna pardah et ou dignité aussi.
Ensuite mo fine arriver conner qui éna quelques madames qui ti pé assiser, et ène officier Lajna fine dire ène l’autre madame qui nous besoin relax dans nous pardah un peu maintenant à cause situation. Besoin péna autant sévérité. D’accord zotte capave relax mais pareil comment mo fine dire avant, zotte capave servi zotte droit et moi mo pour servi mo droit. Li pas possible qui zotte continuer servi zotte droit et pour moi zotte pas laisse moi servi mo droit. Coûte que coûte mo éna pour faire respecter ça enseignement coranique qui Allah fine donne nous-là, insh’Allah. Sinon la porte ouvert, pareil comment mo fine dire, ce qui envie aller li capave aller. Mo pas gagne comprend qui faire zotte éna ça complexe-là, comment li été, qui faire li la ?
Huzoor dire : « Ici éna banne madame de l’Angleterre, de l’Europe, éna banne tifis aussi qui pé rentre dans le Jama’at. Zotte fine commence mette foulard, zotte fine commence couvert zotte la tête, tandis qui parmi ou qui pé vine victime de complexe d’infériorité. Hier même mo fine joinne ène tifi Anglais qui fine rentre Ahmadi quelques jours de cela, li pas ti éna habitude de hijaab mais li ti mette ène trés joli hijaab. Ça banne dimounes-là zotte pé accepter ça joli enseignement-là pour suivre li et éna nous banne madames pé gagne complexe d’infériorité. A part dire Innaa lillah qui capave dire. Si quelqu’un pé penser qui quand faire sévérité le Jama’at pour diminuer, banne dimounes pour sauver du Jama’at, bé rappelle bien qui le Jama’at pas pour diminuer. Si tous banne madames aussi quitter aller, bé c’est Allah So promesse ça qui li pour créer banne nouveau peuples.
Ici parmi banne madames Ahmadi anglaise qui fine vini, zotte bien sincère, et dans l’avenir ou pour trouver qui depuis zotte-même pour éna banne amoureux de Islam ; zotte pour éna l’amour pour l’Islam et banne enseignements islamique. Huzoor dire : « Pour ça tifi qui mo fine mentionner qui ti joinne moi hier-là, éna encore beaucoup comme ça, zotte pé assiser en ce moment devant moi, qui fine rentre Ahmadi et qui pé progresser aller même dans Ahmadiyyat.
Huzoor dire : « Zotte Sadr Saheba ici li pas ène Pakistanaise, li ène Allemande, li faire pardah, li mette burqa, li péna aucun complexe. Donc comment mo fine mentionner, ça madame qui peut-être ène officier aussi, li envie relaxe lors le pardah. En fait à la base autant qui mo comprend, li envie faire ène objection lors moi, qui mo pé agir sévère concernant le pardah. Ça banne qualité dimounes-là quand zotte cause comme ça c’est ène action hypocrite.
Donc gagne ène contrôle lors zotte même. A ça banne nouveau Ahmadis qui pé vini de ça banne peuples-là, mo dire qui si banne qui Ahmadis de naissance pas envie suivre ça banne enseignements islamique-là, pas guette zotte, avancer ou et vine ène exemple pour ça banne dimounes-là. Et quand ou avancer répanne ça banne beautés de Ahmadiyyat dans ça environnement-là. Pardah et la pudeur dans chaque époque et tout le temps ça fine reste banne enseignements de tous banne religions. A l’époque de Hazrat Moussaa.s aussi fine dire dans Qur’an qui ti éna deux madames qui ti pé deboute ène côté, zotte ti pé attane pour donne de l’eau à zotte banne zanimaux. Donc zotte ti pé deboute à cause pardah et haya (la pudeur), zotte ti pé attane qui banne missiers aller pour zotte capave alle devant.
Donc considère la pudeur comme ène partie de imaan (la foi) et c’est ça même qui fine enseigne nous. Banne madames chrétiennes au debut zotte ti pé faire pardah. Zotte ti pé couvert zotte linge. Dans la Bible plusieurs places fine mentionne ça enseignements de pardah-là. si aujourd’hui banne chrétiennes pas pé faire pardah et ça pé affecter ou, bé zotte pé oublier zotte religion. Si ou rappelle ou religion, bé marche d’après ça. Beaucoup banne mals dans lesquels banne dimounes fine plonger, ça pour fini.
Huzoor dire : « Pour banne dimounes qui éna complexe mo pour mentionne quelques banne extraits de la Bible pour ou satisfaction, peut-être ou fine déjà tanne ça avant. Ena ène extrait madame besoin pas mette linge missier et missier besoin pas mette linge madame. Parce qui banne qui faire banne tels zaffaires zotte détester par zotte Seigneur (Deuterenome 22 : 5). Ensuite dans la Bible fine écrire qui faveur c’est ène déception et la beauté li en vain ; mais ène madame qui éna crainte de Dieu li pour honoré et pour faire so éloges.
Ensuite ène place fine écrire comme ça même banne madames besoin mette banne linge modestement et décent et zotte pas besoin décore zotte avec zotte cheveux, zotte l’or, zotte pierres et avec banne vêtement cher mais avec banne bon actions. Banne actions approprier pour ène madame qui proclamer qui li adore Allah. (Mathieu 9 et 10)
Ene lotte extrait : ène missier qui couvert so la tête et prier ou prophétise quiquechose li pé déshonore so la tête, mais ène madame qui prier, prophétise quiquechose sans couvert so la tête li pé déshonore so la tête. Li pareil comment dire li fine rase so la tête. Si ène madame pas mette le voile li besoin coupe so cheveux mais si li ène déshonneur pour ène madame coupe so cheveux ou rase so la tête, li besoin porte ène voile. Ene missier li pas besoin couvert so la tête parce qui li ène image et reflection de Dieu, mais ène madame li reflecter l’homme. Donc Huzoor dire : « Ça banne dimounes-là zotte faire objection lors Islam. A part ça, fine aussi vine apparent qui zotte considère banne madames supérieur à banne missiers. Huzoor dire : « Pas capave discute lors ça banne quiquechoses-là en ce moment.
Huzoor dire : « Après qui nous guette tout ça-là, zotte besoin vine plus fort, zotte banne qui pé suivre banne enseignements qui banne jolis enseignements de l’Islam. Et qui garde ène relation vivant avec Allah alors qui ça société de l’Ouest-là zotte manque ça religion-là. Zotte fine oublier guide de zotte religion. Donc dire zotte qui au lieu qui zotte cause contre nous, au lieu qui zotte écrire contre nous, au lieu qui zotte faire banne la lois, donne banne déclarations contre nous, gagne zotte propre tracas. Au lieu qui zotte essaye découvert nous la tête qui nous pé couvert de plein gré, avec joie, faire zotte banne madames couvert d’après zotte banne enseignements.
Donc encore ène fois mo dire au lieu qui zotte dire besoin souple lors pardah, ou dans banne mots arranger zotte dire qui mo faire sévère lors pardah, fini zotte banne complexe d’infériorité n’importe qui çanne-là qui éna ça dans li. Et suivre ça banne enseignements qui Allah fine donne nous-là. Allah fine faire ça pour qui missiers et madames tous les deux sapper avec le mal. Avant qui dire à banne madames, fine dire ça à banne missiers qui: ‘Baisse ou regard’, ensuite fine ordonne banne madames qui: ‘Baisse ou regard’. Parce qui éna qui plus osé dans banne missiers, c’est pourquoi fine ordonne banne madames qui malgré qui fine dire tous les deux baisse zotte regards, à cause nature de banne hommes, li meilleur pour zotte qui zotte couvert zotte beauté zotte banne partie privé. Afin qui zotte capave sapper avec banne mauvais regard de banne hommes. Ena dimounes qui aussi objecter qui banne Khalifas avant pas ti autant sévère lors pardah. Mo pour mette quelques banne extraits devant ou afin qui ou gagne satisfaction et consolation.
Hazrat Massih Ma’ouda.s dire qui pareil comment l’Europe banne dimounes pé vine bépardah. Mais li pas approprier du tout ça ; c’est ça même racine de désobéissance et de l’indécence de banne madames. Banne pays qui éna ça qualité liberté-là, imagine un peu banne qualités immorale qui zotte éna. Si avec zotte liberté, zotte bépardah, zotte pureté fine augmenter, bé mo pour accepter qui mo fine faire erreur. Mais ça zaffaire-là li clair qui quand missiers et madames zotte jeunes, et éna liberté et bépardah, bé qui quantité zotte relation pour dangereux. Li ène spécialité humaines pour éna de mauvais regards et pour vine victime de banne passions. Donc avec liberté, zotte tombe dans toutes sortes de l’indécence.
Ensuite Hazrat Khalifat-Ul-Massih Sani r.a dire qui pardah religieuse li prouver par le Qur’an, c’est qui ène madame so cheveux, li cou, et so visage besoin couvert jusqu’à devant so zoreilles. D’après ça commandement-là banne différents pays d’après zotte situations et zotte vêtements zotte capave faire pardah d’après ça. Fine dire qui la main jusqu’à ou poignet li besoin dans pardah.
Après Hazrat Khalifat-Ul-Massih Salis(Rehmullah talla) so extrait bien sévère. Ecoute ça bien. Huzoor dire pendant so l’adresse à banne Lajnas dans Norway : « Mo demande à banne madames dans Norway ici qui penser qui le pardah li pas nécessaire, qui service zotte pour faire pour Islam quand zotte rejette zotte pardah ? Aujourd’hui éna dire qui donne nous permission pour pas faire pardah ici. Ensuite zotte pour demande permission pour nager dans banne vêtements bien léger, après zotte pour dire laisse nous gagne zenfants avant mariage, moi mo pour dire zotte prépare zotte pour alle dans l’enfer. Refaire zotte vine correcte avant qui Allah So colère et punition tombe lors zotte. »
Hazrat Khalifat-Ul-Massih Rabbe (Rehmullah talla) fine dire qui : « Parce qui mo ti pé ressenti qui pardah en voie de disparition dans beaucoup places dans le monde comment dire li péna aucun identité. Et en resultat de ça, ça banne situations effrayant qui pé vine guette le peuple, zotte pas réalise ça banne situations-là. Banne mamans papa à çause zotte negligence pé pousse zotte banne zenfants dans ène societe d’enfer. Et péna personne pour prend zotte compte. Ça situation-là pé vine de plus en plus lourd dans le monde en entier. Mo fine penser qui si tout de suite banne Ahmadis pas fine prend ça drapeau de défense de l’Islam-là, ça pour sappe depuis nous la main. Fine dire éna banne tels madames qui besoin alle en dehors mais qui maquiller zotte aller. Maintenant qui connection le maquillage éna avec travail. »
Ensuite li dire qui : « Banne madames penser qui dans ça le monde cotte népli éna pardah-là, si nous mette burqa nous alle devant nous banne camarades, zotte pour dire qui : ‘ça c’est banne vieux l’époque, zotte fine vine folles. Est-ce qui ça c’est ène l’époque de burqa ?’ Et c’est ça même zaffaires qui donne tracas à banne missiers alors qui zotte oublier qui respect de l’âme et respect des autres li créer avec ou propre comportement. Et dans le monde vêtement li péna aucun importance. Si ène dimoune li éna bon comportement ou éna respect pour li. Et ça respect-là en premier ou besoin éna li dans ou l’âme. »
Ensuite Hazrat Khalifat-Ul-Massih Rabbe (Rehmullah talla) dire qui : « Ici, (Huzoor dire qui c’est ène khutba qui fine faire à Londres) ici banne tifis qui pé developper zotte dans ène tracas concernant zotte cheveux. Zotte penser pour couvert zotte cheveux li ène zaffaire qui bien arriérer. (…) En fait zotte pé dire qui : ‘O Allah accepter nous comme ça même, nous fine mette nous dupatta comment dire banne Juifs mette ça ti chapeau-là lors zotte la tête. Donc de To côté accepter ça pas incomplet qui nous pé faire-là.’ Si ou pé faire tout quiquechoses pour la cause d’Allah bé ça zaffaire-là li pas possible. Rappelle bien qui partie qui plus délicat d’ène madame c’est so cheveux surtout quand banne cheveux-là par devant. Ena banne tifis mo fine trouver qui zotte risse zotte dupatta lors zotte la tête d’ène tel façon qui zotte cheveux tombe par devant. Ensuite fine dire : guetter est-ce qui zotte prend compte Allah plus ou bien banne dimounes ? »
Huzoor dire qui : « Ça ti banne extraits de banne différent Khalifas. Ena banne dimounes qui fine commence éna ça pensée qui tel Khalifa pas fine dire comme ça et çanne Khalifa-là pé dire ça. Premier quiquechose c’est qui ou banne dimounes sans conner zotte pé faire badzani (médisance) lors le Khalifa. Comment dire, Naouzobillah, zotte pas ti envie qui banne dimounes suivre banne commandements de base qui Allah fine donner. Huzoor dire : « Banne Khalifas qui fine vini avant, mo fine lire zotte banne extraits afin qui banne dimounes qui éna ça banne malentendus-là dans zotte, ça malentendu-là dissiper.
Deuxième quiquechose c’est qui dans certaines situations, éna Khalifa li mette l’emphase lors ène quiquechose plus, et ène l’autre Khalifa lors ène lotte quiquechose. Donc pour dire qui Khalifa avant-là ti dire tel zaffaire, ou aussi dire même zaffaire, bé ça c’est comment dire ou pé mette banne limites lor le Khilafat et ou pas pé respecter li. Et ça li montrer qui ou fine prend bai‘at seulement sous pression de ou l’environnement, de parents, de ou missiers ou bien de ou zenfants, ou pas fine faire li avec ou le coeur. Si ou fine prend bai‘at avec ou le coeur, bé tous banne zaffaires pour qui ou fine faire promesses pour ou suivre, li devant ou. Et jamais pas dire qui faire fine prend tel ou tel décisions. Laisse mo mette li clair encore ène fois qui si ou envie reste dans le Jama’at de Hazrat Massih Ma’oud a.s, bé ça quelques dimounes qui dire banne tels causer-là, bé ou pour besoin suivre banne enseignements de Qur’an et Hazrat Mohammads.a.w. Ensuite comment le 4ème Calife fine dire : « Ça deux actions-là pas pour marche ensemble, soit ou peur Allah soit ou peur banne dimounes. » Donc aujourd’hui chaque madame Ahmadi so sense de l’honneur demander qui au lieu qui li peur banne dimounes, aujourd’hui dans ça société-là cotte pé sème banne la grains de la haine, annoncer et dire qui quand même combien restrictions zotte metter, zotte pas capave arrache ça joli enseignement-là depuis nous le coeur, nous visage, nous banne actions. Et si zotte pé éloigner avec la religion, zotte pé tombe dans destruction, nous pas prêt pour tombe dans ça l’enfer-là avec zotte. Au contraire nous faire doahs qui Allah sappe l’humanité avec so banne résultats effrayant. Vini et vine ensemble avec nous, et suivre Allah So banne commandements et essaye gagne le plaisir d’Allah. Là-dans même éna tranquillité de zotte le coeur et existence de zotte générations.
Mo espérer qui chaque madame Ahmadi qui si jamais fine éna ène ti doute aussi lors Allah So banne commandements, li pé tire ça doute-là et pé jette li en dehors so le coeur. Et qui zotte vine parmi banne Musulmanes, banne vrai croyantes, banne qui satisfait avec ce qui zotte éna, banne qui éna remords, banne qui pieuse. Qui Allah faire qui li comme ça même ! (Amine !)